ዎ ብሊና!
ዎ ብሊና!
ሰላም ኣጃ እርግርዂማ ይዳን ብሊና፡
ሰላም ኣጃ እርግርኹማ ይሻኒ ብሊና፡
ወርካ ደባን ኣኽሮ መርሓባ ይለና፡
ናንሲ እወኩንካ/ እወኩንኪ ኩናንሲ እውለና፡
ብላሽ ግን ኩት እንገት እና ይና እዲና፡
የዋ ብላሽ ግን ኩት እንገት እና ይና እዲና።
ይጭግዕ ኣኽለማ ፡ የዋ ይመሱና፡
ኳሪልድኻ ይሻማ ፡ ስዊልድኻ ይኣንኮቲሰና፡
ጭምዊውልድ ይጨራ ፡ የዋ ይኮድኚሰና
ኣውኒ ዋንተ እዲናይል ኩሰና።
ዋዲክና ብሊና ዋዲክ ኩሰላምድ
ወረብራኽር ግራራ ፡ ብርፍ ይራኽር ብርክስኘድ
ታኸትልድ ፡ ስምጥልድ ፡ሺራኹልድ፡
ፈየግደለ የቲኩም ይና ጋብ ብሊንድ።
ወሮቦ ኪኹን ግራራ ፡ ኣረርስኚኖ
ይሰፈላልሲ ፍድያ ፡ የዋ ጂኝስትኚኖ
ይዲ ኩዲ ከደምኖ ፡ የዋ ኮድኚኖ
ዳበርድኖሉ ብሊናርሲ ፡ ላናን ኣኽኖ
ኣውንግን ይገለ ኣውዱዂ እንቲ፡
ኣን ግን ኩዳን ብሊና ይት መኸልቲ፡
ኲሻኒኹራ ግን ኣን ፡ እንትኻ የሓልቲ፡
ይትኻ ኣርእለለ ፡ ኣርእራኽር ኣኽታ ይኽርቲ።
ኩዳንድኹራ ግን ኩዳን ልጝን በኽር፡
ወርኩራይማ ደባኑዂ ፡ ወረባ ካርዶ እንትራኽር፡
ውራ ህንብራኹን እንቲ ይታኽሪኹራ ይት ተክራኽር፡
ሓሎዂራ ወርከማ ፡ ሓንቀቅሮ ለገድራኽር።
ይጀማ ወርከማ ድገር ገሻዂ፡
የሓኖራ ተኩላይ ከው ናውክ ኩት ማዲቱዂ፡
ኣጃ ጋሺተኩ ኩል ጋሺታዂ፡
ዲማ ፋሺተኩ ፡ ኩዲ ማዲታዂ
ብራ ፋይሕል እዃርሶ ፋይሕል ለገዳዂ።
ኣጃ ሰኝረኩማ ፡ ሮማይ ይሻኒዂራ
ወርካማ ብክረት ምልምል ይዳንድዂራ፡
ሰላም የካ ስኩሪ ብሊና ይማዲኹራ
ወርከማ ሰርጎ ፡ ይጉልፋሪቁራ።
ጅልልሰና ሓባለክሶ ቋላ ሞላድሲ፡
ይኝ ግን ብሊን ይና ሰኲና ደማትሲ፡
የዋ ይኝ ግን ብሊን ይና በራኻ
ኣሸራ ፡ በጉሲ፡
ሓጋዝትልድ ኣወት ሓመደይ ኣኽራሲ፡
ሓመልማሎ ጀንገረን ኣወት ደኪል ቱታሲ፡
ጣቁርድ ብራ ቁጣ ፍልፍላዂ ንኪ ኣኽራሲ፡
መጋርሕ ሸካ ብሊና ጀመራ ፡ ኣወት ገብሩቁርድ እሮራ ጋእ ይታሲ፡
ይና ታንታርዋ ከረን ጅብርደሪ ሸብ ጥላይሲ፡
ማዕቢኖግን ንኪ ኳራ ለብራሲ ። (2)
ሓመድየኩም ይሻን ፡ እንታ ግናይልድ በሀርልድ፡
ቂርዲ ገርክዲ ለምለም ይድናኽር እንሰከትልድ፡
ቂልስንኹን ይግድኒ ፡ በቀቅግድናኺር እንታ ወክድልድ፡
ባሃ ይንተት ንኪ እንታ ጅዋ ለበክልድ፡
ህጃምሊ እልብርስትኖ ግን ዲመሲ ንኪትልድ፡( 2)
ፍጹም ዘርኣይ ዑቁባይ